-Fúsi í faðmlögum við fauta frá Fjóni-

Já það var aldeilis stemmning hér í Skandinavíu í gærkvöld er þursarnir okkar slógust við Dani. Fúsi Ferskeytla er óðum að ná sér eftir bakfallið á Ferskeytlukveldi Ómars Ragnarssonar. Við ræddum við Fúsa að slagsmálum loknum
“Já ég er bara góður og fann ekki fyrir neinu.
Ekki einu sinni þegar ég var sleginn utan undir.
Ég var kannski svolítið æstur og var fúll yfir því að hafa setið og horft á slagsmálin gegn Sviss, En ég fór kannski fullmikið út á móti skyttunum, en þetta var rosalega gaman. Svo skallaði ég einhvern Dana og hann steinlá.
Og ég fann ekki fyrir neinu.
En maður verður að vera grimmur og taka á, það er ekki hægt annað.”
Sagði Fúsi Ferskeytla við Odd Eyjólfsson blaðamann dverga í Danmörku.

-Er Gummi þjálfari of lítill til að stjórna?-

Vegna reglna Evrópusambandsins um lágmarkshæð ökumanna, hefur það vakið upp spurningar manna hvort Gummi þjálfari sé nógu stór til að stýra landsliðinu.
Vitað er að Þursabolta Sambandið er með Þorbjörn Jensson tilbúinn í starholunum að taka við ef Gumma verður vísað frá keppni.
Össur stoðtæki eru reyndar að þróa stultur fyrir Gumma sem gætu komið að gagni.

Skilinn eftir! - Forysta HSÍ gagnrýnd harðlega

Hann Skúli Þorláksson hringdi í morgun og tjáði blaðamanni Dverga að hann hafi verið skilinn eftir þegar landsliðið í hrindingum hélt utan í gærdag.
Ég var búinn að panta landsliðssæti en gleymdi að greiða staðfestingargjaldið.
Ég kom niður á Úrval Útsýn í gærmorgun eftir að hafa gengið frá Akureyri til Reykjavíkur og ætlaði að greiða farið, en þá var mér tjáð að hópurinn væri fullskipaður.
Mér finnst þetta lýsa skítlegu eðli forystumanna HSÍ að skilja mann svona eftir.
Ég er búinn að taka mér frí í vinnu og búinn að æfa stíft undanfarnar vikur.
Ég er búinn að vera að hrinda krökkunum og berja á konunni frá áramótum og allt til einskis.
Svo er hann taka bakveikan Ferskeytlu Fúsa með til útlanda, mann sem talar ekkert Norðurlandamál.
Ég tala þó mína skóladönsku og er með meirapróf.
Sagði Skúli og gat vart haldið aftur af tárunum er hann hélt af stað heim á leið fótgangandi….

-Þurs fær bit í bak-

Þursinn Sigfús sem er einn aðal bolinn í landsliðinu fékk þursabit í bakið á hagyrðingakvöldi Ómars Ragnarssonar í Tónabæ í gær.
Sigfús tók bakföll að hætti Ómars eftir að hann kom með eftirfarandi ferskeytlu:

Ég heiti Sigfús Sigurðsson
Íslands þursa eina von
Mundbolti er þjóðarþel
Máski líkt og Bjarni Fel

Eftir skeytlu þessa tók Fúsi ferskeytla bakföll af slíkum móð að fjöllin tóku jóðsótt og himinn var myrkri hulin um hánón.
Brast þá bakhlutinn í bola en Fúsi fór samt ei að vola.
Já það er margt sem tröllin þurfa að þola.
Gummi þjálfari ætlar að taka Fúsa með í Þursa kastkeppnina í Legolandi sem fram fer um helgina.
Því ef Fúsi nær ekki að spila verður brugðið á það ráð að vekja upp Þorgeirs bola og setja hann í vörnina.
Séra Pálmi verður því fenginn sem liðstjóri til að sefa dýrið niður með vígðu vatni milli leikja.
Sigfús það er að segja.

- Öxar við ána-

Eftir að hafa tuskað til hina hlutlausu og spöku Svissnesku mjólkurkýr fóru þursarnir okkar til hólmgöngu á Þingvöllum.
Ætlun forsvarsmanna þursaflokksins er að kynna landsliðsmönnum okkar helstu aftökuaðferðir liðins tíma. Var til að mynda nokkrum nýliðum drekkt í Drekkingarhyl, einn fékk að kenna á Brennugjá, galgopi í liðinu var kynntur fyrir Gálgakletti og loks var áð að Höggstokkseyri þar sem snæddur var hádegisverður og fylgst með þegar prestur nokkur var höggvin fyrir að hafa sængað með vinnukonu sinni.
Ferð þessi þótti takast með ágætum, raunar svo miklum ágætum að Sigfús Sigurðsson náði að stauta fram vísukorni.
Hljóðar vísan á þessa leið;
Komum við kappar að velli
Kaun klæja á okkar belli.
Við íspinnar lands vorrar þjóðar
Virðumst við fyrstu sýn sóðar.
Fyrir vísu þessa fékk Sigfús námsstyrk úr konungssjóði er nam fimm ríkisdölum.
Að ferð lokinni er talið að hópurinn sé nú fullskipaður enda búið að skera hópinn talsvert niður í þessari Þingvallaferð.
Það setti hinsvegar leiðindarblett á ferðina að á leiðinni upp Kambana fékk Gummi þjálfari í eyrun og þrátt fyrir að formaður þursaflokksins reyndi að sussa Gumma í svefn, hafðist það ekki og grét því þjálfarinn alla leið heim á hótel. Menn ku hafa af þessum sökum nokkrar áhyggjur af flugferð hópsins til Slóveníu í Tékklandi.